Choorfier in Gramzow
De Lüüt ut uns Partnerstadt Gramzow hebbt ne Inlaadung na Kremp bracht. Dat heet, de Choor “Viva la musica“ hett de “Kremper Liedertafel Lied Hoch“ ton fiern inlaad! Dat hett uns freid und all de Sänger ut Kremp, de vun ehr Doon loslaaten kunn, hebbt sik mit ehr Fruunslüüt op`n Padd in de Ukermark magt.
De Reis hebbt wi all vörn Opstahn losmagt. Dat güng Anno 06.07.2002 Klook halvig-söben vun Amt Krempermarsch los. In twee Autos hebbt wi uns daalsett und sünd den losbrummt. Wi weern man blots twölf Lüüt. Dat weern jo nie veel, aver de weern de Best. De Familien E.A.Bär, Nahrwold, Rath, Rave, Schuldt und Woischwill hebbt sik op`n Weg magt und darbi veel Spott hat. Ünnerwegs hebbt wi op`n “Autobahnrastplatz Stolpe“ Fofteihn magt. Dar ward iirst `n Dischdeek ruthalt, de över und över mit Erdbeerbiller antüncht weer. Und den keem de Wuss, Kees, Brot, Koffee und noch sünstwat op`n Disch. An alln`s is dacht warn, dat weern feinet Frühstück, dat hett good smeckt. Darna güng dat wieder op de Autobahn mit Kurs na Gramzow.De Sünn lacht uns darbi all siit hüüt morgen recht so hardlig an.
In Gramzow ankam, sünd wi glieks to uns “Gastöllern“ , Endurat, Nippert, Behrendt, Bartelt, Herrmann und Fischer hinfahrt. De een und anner weer darbi ok in de Gegen üm Gramzow ünnerbracht warn. Wi sünd all tohoop all mennig mal in Kremp oder Gramzow tosam kam. All kunn wi uns good rücken, as man so seggt. Mit uns “Familien“ harn wi uns`n hopen to vertelln.
Und den güng dat los. Wi hebbt uns fein`n Zwiern antrocken, de Schooh blankschürt und af geiht dat na Zichow in`e Weertschap. To iirst hebbt wi dat “Programm“ losmagt. De Gramzower Choor Viva la musica, de Choor ut Zichow und dat Uckermärkischet Landvolk hebbt de instudeerten Bidrääg to Gehöör bracht. De Kremper hebbt toletzt de “Märkische Heide“ mit all de annern Sängers tohoop tiriliert. Wi hebbt den noch ne lütte Gaav und een paar Wöör vun de Waterkant vör den Gramzower Choor Viva la musica mit ehr Böverst Jutta Dux mitbracht.
Und den güng dat los. All tohoop in`e Weertschap wulln wi Spott hebben. Wi weern an´t rameteern as dull. Op`n Danzsaal weern wi düchtig an`t afpedden und bit schunkeln sünd wi meis`n beten in Sweet kam. De een oder anner Döntje is den ok noch vertellt warn. An de Toonbank hebbt wi uns jümmer wedder dropen üm`n lütten Kööm rünner to geten. De jung`n Lüüt in`e Weertschap weern meist`n beten verbaast, wenn wi tovör noch`n lüüt beten tiriliert hebbt. De Gramzower hebbt den ok noch`ne groode “Tombola“ mit besünners veel Priese und blots mit`n ganz ganz poor Nieten bin ünner de Lüüt bracht. Wi harn all tohoop mennig Spot an düssen avend. Und bevör de Hahn op`n Missen kreiht sünd wi in è Puch bi uns Gastöllern ween.
Sünndag vörmittag hebbt wi in und üm Gramzow tobracht. Jed een hett wat anners mit siin “Lüüt“ magt. Klook dree hebbt wi uns den all tohoop to`n Iis eten meern in Gramzow wedder dropen. Und den hebbt wi Atschüß seggt und sünd na Huus trüch fahrt.
Dank seggen möchen wi vun de Kremper Liedertafel Lied Hoch e.V. all de Gramzower, se hebbt sik so veel Möög mit uns geven. Besünnern Dank geiht an uns Gastöllern. De Kremper “Verein zur Förderung der Partner- und Patenschaften der Stadt Krempe e.V.“ hett uns mit mit Fahrgeld utholpen, veelen Dank darvör.
Kremper Liedertafel Lied Hoch e.V.